ألبــــس ايـــــه ؟

السؤال ده بسأله لنفسى كل يوم الصبح لما بفتح الدولاب واقف قدامه زى احمد حلمى فى جعلتنى مجرما ، مع ان دولابه كان كله قميصين وبنطلون لكن الحيرة كانت طالعه من عينيه ومش عارف يلبس ايه !!

*****

وبرغم ان وضع دولابى ولله الحمد احسن بكتير من وضع حلمى فى الفيلم !! ، الا ان ده ميمنعش انى باقف قدامه نفس الوقفه ، اللى متفرقش كتير عن وقفه الواحد قدام التلاجه لما يفضل مبحلق جواها وكانها تلاجه واحد تانى ، وكأن مش هو اللى شارى كل حاجه فيها ، ومتخيل ان اول ما يفتحها هتحصل المعجزة ويلاقى نفسه جوا مترو

*****

لوقت قريب مكنتش بسأل نفسى كتير هلبس ايه ، مكنش الموضوع محير قوى ، لكن من ساعه ما اشتغلت وده بقى السؤال اليومى وتقريبا يحتل المرتبة التانية بعد سؤال هناكل ايه انهارده ؟ ده اذا مكانش احيانا يسبقه

*****

الاول كان الواحد مش فارق معاه ، اهو بيشوف المشوار اللى رايحه وبيلبس الحاجه المناسبة ليه وخلاص اذا كان الصبح او بعد الظهر ، لكن نزول الشغل -خصوصا للبنات او الستات- بيفرض طبيعه لبس معينة لازم تتلائم مع المكان والزمان ، يعنى مش اللى يطلع فى ايدنا وخلاص -الا بقى بالنسبة للناس اللى مش بيفرق معاها-

*****

علشان كده رغم ان الدولاب مليان هدوم ، بلاقى نفسى بستبعد منهم نسبة كبيرة قوى يمكن تتعدى 90% ، والسبب الغالب ان بلاقى هدومى بقت اكبر منى -اه والله-كل الناس بتشتكى ان هدومها بتضيق عليها لكن انا بيحصل معايا العكس ، عماله بخس لغاية ما ابتديت احس انى بتلاشى ، وطبيعى انى لما البس حاجه حتى لو شرياها من قريب احس جواها انى شبه فطوطة ، اما الاسباب التانية للاستبعاد فغالبا بتبقى ان الحاجه مش مناسبة للشغل ، او مش بعرف اتحرك فيها براحتى ، او كويسة ومفيهاش حاجه بس ناقصها حاجه تكملها

*****

ولكل الاسباب اللى فاتت بلاقى ان الاختيارات المتاحه قدامى لا تتعدى صوابع الايدين ، وان الحلول للموقف الراهن ده تنحصر فى 3 اختيارات :-

1-انى افضل اكل لحد ما اتخن واملا هدومى وبكده استعيد نسبة كبيرة من ال90% من الهدوم المرمية فى الدولاب ، بس ده طبعا حل غير عملى وطويل المدى وممكن ميحققش نتايج خالص

2-انى احاول اظبط الهدوم دى كلها على مقاسى ، والحل ده لو حطيته فى دماغى هقدر انفذه وبنفسى كمان ، لان طول عمرى بحب الخياطة والتفصيل وبظبط اى حاجه بنفسى مش بس كده فى حاجات عملتها لنفسى من الالف للياء ، يعنى لو اركز شوية كان زمانى عملت كل لبسى بايدى ، بس مشكلتى انى ملولة وخلقى ضيق ، فالحل ده مش هينفع خالص خصوصا انه محتاج وقت وصبر

3-انى اريح دماغى واخدها من قصيره وانزل اشترى هدوم جديدة ، او اشوف الحاجات اللى عندى ناقصها ايه واكملها

لكن حتى الحل السهل ده بقيت احسه مستحيل ، بنزل اخد المحلات من اولها لاخرها وبوصل لنتيجه واحدة ، ان اللبس الايام دى بقى حاجة من اتنين :-

1-يا اما عبايات سواء بقى سودة او ملونة او منقرشة اهى المهم اى حاجه واسعه وخلاص ودى طبعا معمولة علشان تدارى سوئات الجسم المصرى اللى انتوا عارفين مواصفاته ، او بيفضلها الناس اللى ملتزمة فى لبسها

2-يا اما بديهات وفستات وفساتين ماسكة على الجسم وحاجات غريبة كتير مينفعش حد يلبسها ، تقريبا متاخد موديلات بعضها من افلام سعاد حسنى ونادية لطفى القديمة ، والبعض الاخر من افلام ناهد شريف ، مع الفرق طبعا ان دلوقتى بيتلبس تحتها حبيب الملايين وفتى الشاشه الاول البادى الكارينا

طب واللى زيى بقى يعمل ايه؟ يعنى الناس اللى واقفه فى مرحلة عمرية ما بين 29 او 30 لحد 40 يلبسوا ايه ، يعملوا زى بنات الاعدادى والثانوى ويعيشوا دور السندريلا بفستانها المنفوش -بس المهم تحته الكارينا والبنطلون-او يشوفولهم بادى يدخلوا فيه زى كيس المخدة

ولا يسلموا امرهم لله ويعبوا نفسهم جوا اى شوال ويزودوا فوق سنين عمرهم سنين لمجرد انهم مش لاقيين حاجه مناسبة

جايز يكون فيه نوعيات لبس تانية وانا مش واخده بالى ؟ بس ليه كل ما بنزل ادور مش بلاقى غير الحاجات دى ، حتى الخامات بقت مختلفه وغريبة ومش مناسبة للجو اللى كل يوم الحرارة بتزيد فيه عن اللى قبله ، خصوصا خامات البديهات اللى بقت فرض قومى على كل الناس لازم تلبسه ، بعد ما كل مصانع الملابس بقت تنسى تركب كمام للهدوم

وبعدين باى حق يتفرض ذوق محدد على كل الناس ، لدرجة بقيت احس ان كل الناس ماشية لابسه شبه بعضها ومفيش اى تميز ، ودى حاجه مستفذه بجد ، لان الناس بتلاقى مفيش قدامها بديل خصوصا وان كل المحلات عارضه نفس الحاجه بنفس الاذواق ، يبقى الناس تعمل ايه؟ وليه الناس اللى بتصنع الملابس مش بيحاولوا يراعوا كل المراحل العمرية بدل ما بيصبوا كل اهتمامهم على الناس الصغيرة فى السن بس ، ولا علشان هم دول القوة الشرائية فى مصر دلوقتى ؟

ولكل ما سبق من اسباب بلاقى نفسى بعد لفتى ودوختى برجع ايد ورا وايد قدام حتى ما حصلتش حنين -على الاقل حنين رجع بخفيه وطلع بحاجه – واقف نفس وقفتى قدام الدولاب ، واسأل نفسى نفس السؤال ، ألبــــــــــس ايــــه؟؟؟؟؟

واهـــــــــــو ده عيبـــــــــــــــــــه
About these ads

67 تعليقات

  1. أحمد منتصر said,

    يوليو 5, 2008 at 7:36 ص

    أول واحد لول

    أنا بالنسبالي مبتفرقش معايا كل فترة أكوي قميص وألبسه لحد لما يتبهدل وبعدين أحطه ف الغسالة وأكوي قميص تاني وكده

    بيبقى عندي طقم واحد يعني بلبسه لحد لما يتبهدل مش كذا طقم مكوي وجاهز

    بالنسبة للملابس الرجالي الجديدة الخامة بقت أي كلام التي شيرت مش بيكمل سنة وتلاقيه بهت
    والأسعار مش ولابد أو إحنا إللي دخولنا قليلة

    بالنسبة للبس البنات فعلا أنا ملاحظ إنه متشابه جدا لإما عبايات فكل إللي لابسين عبايات شبه بعض
    لإما كارينا والبتاع ده اسمه إيه التونيك آه لدرجة إن كتير بشوف بنات لابسة تونيك واحد معنهم ميعرفوش بعض !
    نادر بقى لما ألاقي بنوتة كتكوتة لابسة جيبة كتان الواسعة دية معرفش اسمها إيه بتبقى حلوة أوي

    المهم كله شغال يا ستي مش عايز أطول بقى :)

  2. واحدة مفروسة said,

    يوليو 5, 2008 at 8:52 ص

    تصدقى فعلا المشكلة ديه موجوده بشده اليومين دول و من زمان كمان
    انا لما كنت بشتغل كانت المحلات مختلفه شويه عن دلوقتي..كان ممكن تلاقي تايورات حلوه…وتغيري تحتيها البلوزه و خلاص
    او بدل…
    دلوقتي ولا حاجه خااالص كل المحلات زي بعضها و حاجه الصراحه مش حلوه خالص
    كان الهدوم ديه واحد احتكرها هيه رخره..و خلاها كلها زوق واحد
    بصي احسن حاجه للشغل الحاجات الكلاسيك
    حتي لو جاكت.بدله مثلا على بنطلون او جوب.. و الشوميزات هيه اللي تتغير..حتحسي انك غيرتي فى الهدوم
    ربنا معاكي
    انا بأه دلوقتي لما الاقي نفسي كده محتاره آخدها من قلصرها و أقول مش خارجه

  3. سبهللة عالاخر said,

    يوليو 5, 2008 at 10:38 ص

    تصدقى انا لسه كاتبة بوست عن موضوع اللبس دة بس بعد موقف حصلى شخصيا وكنت داخلة اقولك تعالى عندى لان رأيك يهمنى جدا لاقيتك انتى كاتبة برضه عن البادى الزفت كارينا دة اللى مجنن البنات والستات
    =====
    ماتنسيش تيجى تدينى رأيك لانه يمهنى

  4. خمسة فضفضة said,

    يوليو 5, 2008 at 12:08 م

    السلام عليكم ورحمة الله وبركاته

    فعلا موضة اللبس اليومين دول بقا حلجه تقرف تحسي انهم مصممينهالناس مش من هنا خالص

    ومعظم التايرات تلاقي قماشها سواريه والبنات لابسينه عادي بالنهار والشمس عامله معاه احلي شغل

    ولا نظام الطرح اللي طالعه ماتعرفيش اللي لابساها دي محجبة ولا رايحه تحيي فرح

    احسن حاجه تفصلي اللي علي ذوقك واللي يتماشي مع الحجاب ويكون شيك وبسيط بس المهم تلاقي خياطه شاطره ودي حاجه نادره اوي دلوقت

    بس سيبك انت احسن حاجه انك بتخسي لوحدك كده ، يابختك ازاي بتعمليها

    اللهم لاقر ولكنه حسد
    هههههههههههههههههههههه

    سلام يا قمر

  5. Crystal Lobna said,

    يوليو 5, 2008 at 12:16 م

    قولى يا دودى قولى . فعلاً الهدوم دى فعلاً بقت حاجة قرف. مفيش حاجه الواحد يقدر يروح بها الشغل.
    يالله بقى هنعمل أيه؟
    سلام

  6. •√أريـ السمر ـج√• said,

    يوليو 5, 2008 at 1:05 م

    بوست جميل لأنها مشكلة بتواجه اغلبنا
    انا ساعات بيجيني شعور ان مصانع الملابس متواطئة مع كارينا:)
    بقى علامة الجودة لأي طقم لبس و كأن مافيش حد بيلبس كم كامل مع ان الأغلبية محجبات

    غير شعورك انه البنوتات بقوا لابسين زي موحد بنفس الألوان ..
    ربنا يعينك و تلاقي حل

    دمتى بكل خير

  7. اهو ده عيبه said,

    يوليو 5, 2008 at 2:52 م

    احمد منتصر
    ———–
    والله انت مروق ومكبر دماغك وبعدين الرجاله مش بتفرق معاهم الحاجات دى
    ولا بيبصوا لبعض لابسين ايه وعاملين ايه
    وفعلا البنات بقت شبه بعضهافى الهيئة واللبس والشكل
    والجيبة يااحمد فعلا اسمها جيبة كتان وهى فعلا حلوة بس لو اتوظفت مع لبس صح

    وشكرا انك اول تعليق رغم انه تعليق رجالى :)

  8. اهو ده عيبه said,

    يوليو 5, 2008 at 2:55 م

    واحده مفروسه
    ————-
    والله يا مفروسة ياختى لحد وقت قريب مكنتش الاذواق كده خالص
    مش عارفه فجاه الاوضاع اتقلبت
    الظاهر فعلا الموضوع احتكار للذوق العام
    وعلى رايك مفيش احسن من الكلاسيك بينفع لكل وقت بس هو فين

  9. اهو ده عيبه said,

    يوليو 5, 2008 at 2:58 م

    سبهلله ع الاخر
    —————
    والله سعيده بتوارد الخواطر ده
    هو فعلا البادى الكارينا ده ملا الدنيا لدرجه انى بقيت حاسه ان البنات بيتولدوا بيه
    بس نعمل ايه انا نفسى جار على الزمن وبقيت اطر البسه تحت حاجات

    حسبى الله ونعم الوكيل فى اللى كان السبب فى قله القيمة دى

  10. اهو ده عيبه said,

    يوليو 5, 2008 at 3:32 م

    خمسه فضفضه
    ———–
    وعليكم السلام
    والله انا مرة دخلت محل اقيس حاجه مبقتش عارفه دى عبارة عن ايه ولا تتلبس ازاى
    عايزة معاها كتالوج ورغم انى رفيعه حستها طابقه على صدرى مستحملتهاش

    وفعلا مش عارفه ايه موضوع اللميع والبربرق ده فى عز الظهر كان الناس رايحه حفلات
    معادش فيه ذوق خالص

    ياريت تشوفيلنا اسم فيتامين كده يصلح ما افسده الدهر :)
    تحياتى

  11. اهو ده عيبه said,

    يوليو 5, 2008 at 3:34 م

    لبنى
    —–
    هنعمل ايه بس السوق بيخاطب شريحه معينة من الناس
    والبنات فرحانه باللبس
    مهو لو فيه اجماع على الاعتراض هيغيروا الحاجات دى غصب عنهم ويحسنوا الاذواق لكن هم شايفين الناس مبسوطه

    تحياتى لكى

  12. اهو ده عيبه said,

    يوليو 5, 2008 at 3:37 م

    اريج السمر
    ————-
    المسالة موقفتش عند التاطؤ مع مصنع كارينا
    دى امتدت لمصانع تقليد الكارينا كمان فبالتالى بقى سهل اى واحده تشتريه

    انا مش عارفه ده توفير قماش يعنى الكم اللى فارق قوى
    ولا هى محاولى لان الناس تبقى شبه بعضها ونبقى ولا الصيت الشعبية ايام توحيد الزى

    شرفتى ونورتى واتمنى تكررى الزيارة

  13. نعكشة said,

    يوليو 5, 2008 at 4:13 م

    مش عارفة
    انا كمان بقف قدام الدولاب خمستلاف سنة
    وفي الاخر
    بلبس نفس اللبس اللي لبستو امبارح
    مع تغيير البلوزة و الايشارب

    المشكلة ان عندي هدوم كتير ودة اللي مخلي ماما او بابا ميخلونيش اشتري حاجة
    المهم يبقي الموضوع صعب

    ممكن علي فكرة تعملي مكس بين الحلول اللي قدمتيها

    مثلا الحاجة الشيك قوي عندك او حاباها قوي ممكن تصغريها عليكي يعني مش لازم كل حاجة اختصارا للوقت وا لملل

    و تنزلي تشتري بعض الحاجات عشان تكملي الحاجا الناقصة

    في الحقيقة انا مشتريتش حاجة قبل كدة غير السنة اللي فاتت بس لقيت حاجات كويسة وواسعة و قشطة يعني

    مش لازم تلبسي بدي كارينا ( غير انه مايص) إلا انه حر و كتمة

    بصي فيه حل آخر
    لو معاكي كريدت كارد او فيزا او حاجة زي كدة
    ادخلي علي ebay او شركة معينة زي old navy او guess او Gap او newyork and company او حاجة من الحاجات دية
    وتقي كذا حاجة
    ويشحنوهالك علي هنا
    و اعتقد فيه ناس قالت ان الشرا عن طريق الانترنت ارخص او كويس
    بجد في المحلات او السايتات دية لو روحتي علي جوجل
    هتلاقي حاجات تناسب كل الاعمار
    و كل الأشكال
    و بأسعار كويسة

    و ساعات بينزل علي حاجة sale بتنل سعرها من 30 $ ل 10 $ او حاجة و عشرين
    ولو عندك حد عايش برة خلية يشتريلك الحاجات اللي انتي نقيتيها من السايتس دية افضل

    عامتاً

    اتمني لكي دوام الصحة و راحة

    دمتي سالمة

    سلامون عليكي

  14. (احمد سكر ) said,

    يوليو 5, 2008 at 5:35 م

    مممممممم

    والله انتى اخترتى موضوع كلنا بنفكر فيه يوميا

    الا وهو اللبس

    بس صراحه

    ام محمد مريحانى

    بتغسل الغسيل

    وتكوى الهدوم

    واتوه انا بئه

    هههههههه

    تحياتى اختى الفاضله

    اخيكى

    احمد سكر

  15. coffee break said,

    يوليو 5, 2008 at 6:06 م

    فعلا انا مش عارفة ايه الكويس فى الباديهات الكارينا المعفنة دى. دة انا مش بستحملها فى الشتا، بحسها طابقة على نفسى و زانقة على زورى، رغم ان مش تخينة. العجيب تلاقى البت من دول تخينة و مقلوظة و ضاربة الأتنين بادى فوق بعض و تحتيهم البنطلون و البادى محدد كل المرتفعات و المنخفضات عندها و غالبا مابيبقاش فيه منخفضات بتبقى مرتفعات بس، و من ورا مرتفع كبير اوى و ماشية منتهى الثقة بالنفس.
    و لا الألوان، السنة دى انا كرهت الأخضر و الأصفر، الشارع كله ماشى لابس لونين اخضر و اصفر.
    و لا الشنط و الجزم الذهبى و الفضى ، ايه القرف دة و ايه الجزم الباليرنات اللى مابقاش فيه غيرها دى. دلوقتى انا واحدة عايزة حاجة مفتوحة و بكعب صغنن شيك كدة، لفيت البلد كلها مش لاقية
    و لو فكرتى تجيبى تايير و لا حاجة تلاقى الجاكت حلو و اخر تمام و انزلى اتفرجى على الكرانيش اللى فى الجيبة، كأن اللى صمم التايير صعب عليه ان حد يعجبه التايير.
    و المقاسات يا صغير نونو يا كبير مبهوق كأن الناس المتوسطة مالهاش حق تلبس
    حاجة آخر قرف بصراحة

  16. ňįĝŗő said,

    يوليو 5, 2008 at 7:35 م

    رغم إن البوست ده كارف كده على حريمي حبيتين تلاتة قولي تسعسن حبة
    و كان فاضل تكتبي جنب العنوان للنساء فقط
    بس و لو .. هأعلق برده
    ما هو ما ينفعش تبقى أول زيارة ليا و ادخل بإيدي فاضية
    بالنسبة لأحمد حلمي كان في فيلم مطب صناعي مش جعلتني مجرماً
    بالنسبة للمدعو البادي مارينا ده .. دي تاني مرة النهارده اقرا بوست يحمل في طياته اسم هذا الكائن و ده هيخليني أسأل أستشير عمنا جوجل الله يكرمه عن ماهية هذا الكائن اللي باين عليه منتشر بس أنا عايش في كوكو تاني
    بالنسبة لملابس البنات أنا باحس إن المصانع سقط من حساباتها صاحبات الرصيد الثلاثيني
    يعني هما يا إما بينتجوا (أو بيستوردوا) ملابس لسن 20-25 يا إما 40 فيما فوق
    و صاحبات المقام الرفيع من ذوي الثلاثينيات مهضوم حقهم لدرجة إن أغلبهم بيقصل هدومه إن ماكنتش دي معلومة خاطئة محدودة الإنتشار
    أما بقى بالنسبة لمشكلة المشكاكل و معضلة المعضللات ذات الطابع الحريمي الخالص شامل جميع الفئات و هي مشكلة ألبس إيييييييه؟
    بأحس إنكم محبّكينها شوية
    يعني التفكير في المشكلة دي و تنفيذ الحل المقترح بياخد على أقل تقدير نص ساعة
    النص ساعة دي الواحد مننا مش بياخد عشرها علشان يلبس
    هوب تلاقي الواحد مننا رازع القميص أو التيشيرت و دوغري شامط المنطلون
    و بالهنا و الشفا
    بس طبعاً ما نقدرش نتكلم في الجزيئة دي بالنقد .. علشان تاجات روؤسنا من أمهات و اخوات و زميلات ما يزعلوش
    هييييييه .. إنها طبيعة النساء

    بعد الرغي ده كله .. الله اسأل أن يلهمك الصبر و طول البال على اكمال القراءة

    يلا سلام

  17. رئـــــيسـة حزب الأحلام said,

    يوليو 5, 2008 at 8:19 م

    هههههههههههههه
    لا بجد انا بحس الاحساس دة بجد انا بردة مش بلاقى لبس مناسب لما أفتح الدولاب غير ان لبس السنه اللى فاتت ماعدتش ينفع البدى والفستان
    بجد انا زهقت نفسى الاقى حاجه محترمه وفى نفس الوقت تكون شيك
    دمتى بكل ود ياقمر

  18. kochia said,

    يوليو 5, 2008 at 9:40 م

    كلنا بنعاني من المشكلة دي
    ويا سلام بقي علي المكوي
    لازم تكوي كذا قطعة

    المهم لو المشكلة حقيقية سيبك من انك توضبيها لنفسك
    خديهم شروة لترزي ولا خياطة بتظبط الهدوم واشتري دماغك
    انا كنت زيك كدة والهدوم اللي عاوزة اظبطها بتفضل في الدولاب سنة وكل يوم ابص عليها واقول دي عاوزة تضيق ودي عاوزة توسع وفي الاخر اختي خدتهم وودتهم عشان تستريح مني وبلبس دلوقتي كل الدولاب
    اشتري دمااااااغك

    تحيات

  19. نهر الحب said,

    يوليو 6, 2008 at 7:20 ص

    انا كمان باخد وقت على ما اعرف هلبس اية
    وحتى فى الاختيار لما اجى اشترى لان زى ما نتى قلتى اللبس بقى لعباية لامن الاخر مايوه
    حاجة تحير وكمان غير مناسبة لكل الناس
    بس اقول اية

    اهو بنات بتعك وخلاص

    بوست حلو

  20. Mohamed Dawod said,

    يوليو 6, 2008 at 7:25 ص

    سلام عليكم
    طبعا أنا داخل أعلق وأنا محرج جدالان الموضوع حريمى قوى وانا أساسا مفهمش فيه والحمد لله معرفش أفرق الكارينا عن المكارينا عن المكرونه. والحمد لله كمان زوجتى لبسها كله من نوعية العبايات اللى بتريح دماغها ودماغى وبتتعب جيبى. أنا بس حبيت أقول حاجه واحده على الموضوع ده. أن انا أكتشفت هنا فى الخليج ان احنا فى مصر بيضحك علينا فى موضوع اللبس ده وخصوصا اللبس القيم مش المضروب. القاعده هنا بين المصريين معروفه لو ناوى تجيب لبس أى كلام يبقى هات من مصر أرخص وأحسن انما المتعه الحقيقيه هنا فى شرا اللبس الماركات العالميه اللى خامتها تجنن وأذواقها تهبل. ويا سلام بقى اليومين دول كمان أكتشفت انهم بيعملوا سايل حقيقى وبجد مش ضحك على الدقون على كل حاجه من أول الملبوسات والمفروشات لحد النظارات. أدخل توكيل بيير كارديان مثلا الاقى البنطلون اللى لسه شايفه ب400 بقى 150. حاجه تهبل . يعنى الخلاصه علشان أنا لو طولت فى الموضوع ده حتقولوا انى عاوز أغيظكم لا سمح الله. التجار فى مصر دلوقتى هما اللى عاملين المشكله دى علشان يزودوا هامش الربح من البضاعه المضروبه اللى بيجيبوها. علشان كده انا متفق تماما مع نعكشه فى أن الحل لو قفلت معاكى خالص أنك تشترى من النت. أنما قوليلى هوروما هاى كلاس و بنجوان و كريستينا مش لسه شغالين فى بورسعيد ولو قفلوا؟. يارب مكونش طولت عليكم ولا أتدخلت فى اللى ماليش فيه….تحياتى وشكرا

  21. اوعى تفكر said,

    يوليو 6, 2008 at 10:36 ص

    الظاهر ان المشكله دى عند كل ناس
    سبحان الله انا كمان
    بفتح الدولا وابص على التشيرتين اللى عندى وال3 قمصان ومعرفش البس ايه ولا ايه من كترهم يعنى
    بس اللى بيفرق معايا وبيحسم الامر اللى بلاقيه مكوى بلبسه وانزل
    اصل محسوبك بيستنى لما حد يكوى عشان يقرفه بمكوته
    ياخساره كان نفسى اقولك لو عندك حاجه زياده اتبرعى بيها ليه
    بس الظاهر مش هينفع

  22. مواطن مصرى نايم said,

    يوليو 6, 2008 at 12:34 م

    ههههههههههههههههههه
    لا بوست جامد و الله
    و الا البادى الكارينا بجد تحفة الحتة دى
    بس عارفة ان حيرة احمد حلمى كانت اكبر من حيرتك برضوا
    بس مشكلة البنات عموما فى اللبس
    ان دلوقتى اللبس بقى شكل بعضة
    الاختلاف فى اللون بس والخامة واحده
    و كل اللبس لازم يشمل البادى الكارينا
    اما بقى لو كان البادى الكارينا من المضروب
    اللى بيحطوه دلوقتى فى اكياس و غلاف البادى الكارينا الاصلى
    فده بيخلى الواحده كمان تشترى بادى كارينا تانى و تدور على لون معين
    و رجليها تدوب من اللف على اللون اللى هى اصلا مش عارفاه وهكذا

    يوست جميل
    eslam

  23. مواطن مصرى نايم said,

    يوليو 6, 2008 at 12:38 م

    اه صحيح ايه اخبار الصداع
    لعلمك البرشام اللى انا اديتك اسمه كويس
    و ملهش اثار جانبية
    اصلى انا بعانى من الصداع المزمن ده برضوا
    فتلاقينى خبرة فى الحاجات دى

  24. مواطن زهقان said,

    يوليو 6, 2008 at 12:46 م

    اول زياره
    بس مدونه رائعه
    عن اذنك
    اتجول جوله فى المدونه
    سريعه كدا واجيلك تانى

  25. اهو ده عيبه said,

    يوليو 6, 2008 at 4:50 م

    نعكشه
    ——-
    شكرا على الحلول اللى قدمتيها ولو انى مش عارفه الاسعار دى حقيقيه ولا ايه
    الخوف تبقى الحاجه ب10$ وشحنها ب100

    عموما كتر خيرك ودايما كده منورانا بزيارتك

  26. اهو ده عيبه said,

    يوليو 6, 2008 at 4:53 م

    احمد سكر
    ———–
    ربنا يخليلك ام محمد يارب علشان تعرف قيمتها وانها شايلة عنك دوخه اللبس والتفكير فيه
    ربنا يخليكم لبعض
    وتحياتى لك

  27. اهو ده عيبه said,

    يوليو 6, 2008 at 4:58 م

    coffe break
    ————
    والله انتى كلامك تمام
    واضيف للون الاصفر والاخضر اللون الموف كمان
    وفعلا انا مش طايقه الجزم الباليرينا كان الناس كلها بقت سنديريلا
    والجيبات اللى كلها ترتر ولميع هى والجزم والشنط فى عز الظهر
    ورغم ان المقاسات بتاعه عيال سبحان الله بتلبس افيال
    اهو دول اللى حطوا الفيل فى المنديل

    تحياتى ليكى وربنا يصبرنا

  28. اهو ده عيبه said,

    يوليو 6, 2008 at 5:26 م

    نيجرو
    ——–
    يا اهلا وسهر شرفت ونورت
    ومعلش هى جت بالصدفه كده ان البوست حريمى حبتين
    بس معقول متعرفش البادى الكارينا ده نجح فى غزو مصر اسرع من التتار
    وتلاقى كل البنات لابسينه على جسمهم زى بدل الغطس كده

    وانت عندك حق اصحاب التلاتينيات ضايعين ومش لاقيين حاجه تنفعهم
    انما اللى متهنيين بجد الرجاله بيلبسوا اى حاجه ولا تفرق معاهم
    حظوظ

    شرفت ونورت واتمنى تكرر الزيارة

  29. اهو ده عيبه said,

    يوليو 6, 2008 at 5:38 م

    رئيسة حزب الاحلام
    —————-
    الحمد لله ان فيه حد حاسس بكده زيى
    والمشكلة انك لولبستى اللى بتحبيه هتحسى انك مش لابسة على الموضه
    وده لان كل الناس هتبقى لابسه غيرك
    يبقى ايه العمل؟

    ربنا يحلها من عنده
    تحياتى لكى

  30. كراكيب said,

    يوليو 6, 2008 at 5:42 م

    ايه دااااااه يعني مش انا بس بقى اللي عندي الممشكلة دي؟؟

    وعلى فكرة بقى موضوع تقسيمة الهدوم دي حتى مش نافعة اللي ف سني اللي هو 18 سنة ده
    لان العبايات مش سني
    والبديهات والشيميزات اللي فوق فوق فوق الكمر مش استايلي

    وده اللي خلاني لغاية دلوقتي ماجيبتش لبس صيف السنادي لاني مش لاقية اي حاجة عدلة في المحلات

    ايييييييييييه هيفضل موضوع الهدوم ده مشكلتي اللي معرفش هتتحل امتى

    شوفتي قلبتي عليا المواجع ازاي :)

    مدونتك عسولة خالص يا داليا بجد

    miro-

  31. اهو ده عيبه said,

    يوليو 6, 2008 at 5:43 م

    kochia
    ——-
    والله عندك حق لو اعتمدت انى اظبطهم هفضل مكسلة على طول
    الحل هو الخياط
    واكبر دماغى

    تحياتى لكى

  32. اهو ده عيبه said,

    يوليو 6, 2008 at 5:46 م

    نهر الحب
    ——–
    هى حاجه تحير بعقل
    كله من اللى حيرونا ومعملوش اى اختيارات تانية

    تحياتى لكى ونورتى المدونة

  33. اهو ده عيبه said,

    يوليو 6, 2008 at 5:57 م

    محمد داوود
    ———-
    ياسيدى انت تعلق زى ماتحب ووقت ما تحب والحمد لله ان زوجتك مرتاحه بلبسها

    بس انت عندك حق اللبس فى الخليج احسن خامات وماركات بس طبعا الحاجات دى هناك بس
    هنا علشان تجيب حاجه ماركة يبقى خراب بيوت
    اماروما وبنجوان فالله يرحم ايامهم
    كريستينا شغال على خفيف
    بس كلهم اذواقهم متناسبش حد

    تحياتى لك وترجعلنا بالسلامه

  34. Z_Diva said,

    يوليو 6, 2008 at 6:00 م

    enty hat2olely ya5tchyyyyyyyyyyyyyyyyyyyyyyyyyyyyyyyyyyyyyy, de lalela beda we alf sana 5adra, kol yom 3asob7 lazm at2a5ar 3shan 5atr haza elmandou3 :’( walw inny ana barra lelt elcarena de -bt3aml m3 karena brotel 3ashan alla yhed de dekoltehat m3rfsh m3moula lbamilla anderson 3′aliban :S-

    yalla m3lish 3liky we3al tafseel b2a

  35. اهو ده عيبه said,

    يوليو 6, 2008 at 6:00 م

    اوعى تفكر
    ———–
    ياسلام احسن حاجه
    بس لو تتعلم تكوى يبقى ريحت دماغك ومتستناش حد يكويلك

    كان بودى اقولك اتفضل حاجه بس العيب بصيرة والايد قصيرة

    شرفت ونورت ومتحرمناش من الزيارة

  36. اهو ده عيبه said,

    يوليو 6, 2008 at 6:06 م

    مواطن مصرى نايم
    —————
    ازيك يا اسلام

    الموضه دلوقتى 2 بادى فوق بعض و 3 طرحات كل واحده لون شكل ده غير الشنطة والجزمة اللى بينوروا فى الضلمة بدل الفلاشر كده
    وتبقى دى قمه الشياكه
    هنقول ايه بقى زمن

    شكرا على سؤالك عن الصداع والحمد لله بقاله كام يوم غايب يجعل كلامنا خفيف عليه
    بصراحه انا مجربتش البرشامه بس مسيرى اجربها
    وسلامتك الف سلامه من الصداع المزمن

    تحياتى لك

  37. اهو ده عيبه said,

    يوليو 6, 2008 at 6:11 م

    مواطن زهقان
    ————
    اهلا وسهلا شرفت ونورت
    خد راحتك البيت بيتك وان شاء الله المدونة تعجبك

  38. اهو ده عيبه said,

    يوليو 6, 2008 at 6:17 م

    كراكيب
    ———
    يا حبيبة قلبى قلبت عليكى مواجع ايه
    لما انتى 18 سنة وبتشتكى من اللبس امال لما تبقى 30 زيى هتعملى ايه

    بس ده دليل على انك رافضه اللى بيحصل وده فى حد ذاته شئ كويس خللى اصحاب المحلات يعرفوا ان كل الاعمار رافضه اسلوب اللبس ده

    ومش هقلب عليكى تانى سماح المرة دى
    تحياتى

  39. اهو ده عيبه said,

    يوليو 6, 2008 at 6:21 م

    z_diva
    ——–
    اهلا بيكى فى جماعه المحتارين
    بس ايه البادى اللى قلتى عليه ده اللى غير الكارينا ؟ اصل اختك متعرفش غير المدهول على عينه الكارينا بس

    وعلى رايك ديكولتيهات معموله عموله مش لاى حد ولا تنفع حتى باميلا

    تحياتى ليكى

  40. نوره الخشن ــ آي و كفاية said,

    يوليو 6, 2008 at 8:04 م

    والله يا اختي كأنك بترجمي اللي جوايا

    حتى لما كنت بروح الجامعة مش بحتار ألبس ايه لأني اساسا بزورها مرة فالاسبوع ده ان حصلت اساسا وماليش في جامعة القاهره كلها غير صديقة واحدة بس وكانت كمان دلوقتي رجعتلها جوابتها(مابئناش اصحاب يعني لحد يفهم غلط ولاحاجة)

    المشكلة بئى لما يكون عندك 3ايام فالاسبوع كورس الساعة 10 الصبح ياختييييييييييي

    اساسا انا بصحى بدري مضروبة 158 شبشب على دماغي ونازلة من 6 اكتوبر للجلاء

    تخيلي المأساه وكمان لازم اروح شكلي ابن ناس لأن صعب اوي نتكسف اودام الاجاب والطلاينة اصلا لسانهم طويل خلقة فالواحد مش ناقص احراج

    قلبتي المواجع بس دمتغك واسلوبك حلو والله وانا كنت مستنية الجديد بتاعك من مدة

    تحياتي واسفة للاطاله

  41. نوره الخشن ــ آي و كفاية said,

    يوليو 6, 2008 at 8:05 م

    ااااه حاجة كمان معلش

    تقريباً بتوع محلات الهدوم مش عاملين حسابهم ان في محجبات معاهم فالدنيا فالبس كلو يا تكون البطن باينة او الصدر باين او السيقاااان كلها باينة الحقيقة هما الود ودهم يعملوا انفتااااااااااااااح ونعيش كلنا اخوات مع بعضينا

    انتي ضد الانفتاح ولا ايه

  42. نعكشة said,

    يوليو 6, 2008 at 8:40 م

    بصي هيا اسعار الهدوم العادية
    بتتراوح بين 35 دولار ل 20 دولار
    وفية حاجات بتنزل ل 12 و 6 دولار
    بس لازم تتصيدي الsale و مبتبقاش كل المقاسات
    المهم

    مش عارفة بس ممكن اسئلك قريبتي لو تعرف تجيب حاجة مثلا و ابقي اديهالك مش حضرتك من القاهرة برضو ؟؟؟

    بصي هسألك الاول قريبتي لو توافق
    و لو وافقت ساعتها ممكن تقوليلي الحاجة اللي انتي محتاجاها
    عشان هيا بإذن الله نازلة في الصيف
    شهر اغسطس ان شاء الله

    متحطيش امال كبيرة علي قريبتي عشان ممكن متوافقش
    في حال بقة هتقرري عملية الشحن دية

    مممم

    بصي انا سألتلك و قالي إن من 20-50 دولار يعني *7 = ارقام فظيعة فحضرتك تنقي حاجات كتيرة تجيبيها

    و اعتقد انه حل فاشل

    بصي هسألك قريبتي و ربنا يستر و توافق

    دمتي سالمة

    ربنا يعزك يا رب دايماً

    سلامون عليكي

  43. نعكشة said,

    يوليو 6, 2008 at 8:41 م

    الشحن من 20-50

  44. الستة بتوع صيدلة said,

    يوليو 7, 2008 at 12:28 ص

    ههههههههههههههههههه
    موضوع لذيذ فعلا

    احسن حاجة انك تتعلمى تفصلى لبسك لنفسك

    دا اللى انا بحاول اتعلمه دلوقتى
    ما بالك انتى بتعرفى بقى

    BREAK

  45. بنوته مصرية said,

    يوليو 7, 2008 at 2:05 ص

    اه والله يا دولي

    فعلا ده سؤالنا كلنا وسؤال محير جداااااااا

    انا بقي زهقت زهقت بجد من كل اللبس لدرجه اني بقيت بزهق من الخروج

    من كتر حيرتي في اني البس ايه

    بوست جميل جداا

    وحشتيني

  46. عاشقة الحب said,

    يوليو 7, 2008 at 2:51 ص

    انا كل يوم
    بسال نفسي نفس السؤال ده

    ربنا يعينا

  47. esraa said,

    يوليو 7, 2008 at 10:38 ص

    ههههههههه

    ربنا معاكي يارب

    هو فعلا بقت مشكله ان كل الهدوم شبه بعض اويييييييييي

    بس انتي طالما هتزهقي من انك تضيقي هدومك بنفسك
    وديهم لحد يضيقهم بدل ماهم كده

  48. الزواج.....روضة الحب said,

    يوليو 7, 2008 at 5:38 م

    لو كنتي شوفتيني كنتي هاتعرفي إزاي أنا مريحة دماغي خالص من الموضوع دة
    كان نفسي أشوفك أوى وسألت عليكي يوم الحفلة،بس مالقتكيش0

  49. Street said,

    يوليو 7, 2008 at 5:44 م

    أجمل ما فى المدونه انها عفويه .. دخلت كثير من المودنات ولاحظت تقريبا نفس الأسلوب فى الكتابه الا ان هذه هى المره الأولى لأشعر أننى أستمع اليك وانتى تحكى وتسردى هذه الكلمات خصوصا (ان المشاكل اللى بتتكلمى عنها عامه وأغلبنا بيعانى منها كل يوم تقريبا .. علشان كده هى أصلا محسوسه ) ….

  50. white heart said,

    يوليو 7, 2008 at 8:45 م

    و الله عندك حق فعلا ..انا كنت فاكره انى انا اللى مش طبيعيه لأنى مش لاقيه حاجه عاجبانى فى محلات الملابس من فتره ..و كل يوم افتح دولابى و اقول البس ايه و الاقى انى ضرورى اجيب حاجات جديده ..و انزل الف الدنيا و ما الاقيش للأسف الا بطلوع الروح .. و فعلا كل الناس فى الشارع لابسه نفس الموديلات المحدوده المتوافره دى .. و الموضوع بدأ يوصل للأحذيه كمان مافيش غير مودلين ماليين المحلات مع اختلافات طفيفه و كلها مقفوله و احنا فى عز الصيف .. امبارح دورت على صندل مالاقيتش ابدامافيش الا الجزم المقفوله خالص دى او بأه السابوهات اللى الواحد يعد يجرجر فيها طول ماهو ماشى و يخاف تتخلع منه فى زحمة المواصلات .. بجد الواحد مش عارف يعمل ايه .. نسافر بره نشترى هدوم و جزم؟؟

  51. اهو ده عيبه said,

    يوليو 7, 2008 at 9:24 م

    نورة الخشن
    ———-
    ربنا يكون فى عونك ايه العذاب النفسى ده
    اجانب وكلام من ده
    وفعلا عندك حق لازم نشجع الانفتاح وسياسه المكاشفه والشفافية وكل الحاجات دى

    ربنا يصبرك وتحياتى ليكى

  52. اهو ده عيبه said,

    يوليو 7, 2008 at 9:28 م

    نعكشه
    ——-
    يا حبيبتى انتى تعبتى تفسك وسالتى
    عموما ميرسى ليكى بس هو الحل ده مش مناسب معايا
    وكمان ان مش من القاهرة انا من بورسعيد
    يعنى طبيعى فيه المصرى والمستورد بس المهم الحاجه المناسبة ودى المشكلة

    عموما ميرسى على اهتمامك ومتحرمش منك
    سلامى ليكى

  53. اهو ده عيبه said,

    يوليو 7, 2008 at 9:31 م

    الستة بتوع صيدلة
    ——————
    يا اهلا باحلى ست ستات
    وشرفتم المدونة ونورتوها
    واتمنى تكرروا الزيارة

    وبالنسبة لbreak ان شاء الله تتعلمى ونشوف حاجات حلوة من ايديكى

    سلام

  54. اهو ده عيبه said,

    يوليو 7, 2008 at 9:33 م

    بنوته مصرية
    ————
    انتى اللى بجد وحشتينى يارودى وكنت قلقانه عليكى
    بس الحمد لله انى اطمنت ومتغيبيش علينا تانى

    وياريت الواحد يقدر يعمل زيك ويقول مش نازل كان ريح دماغه
    سلامى ليكى ولبنوتك

  55. اهو ده عيبه said,

    يوليو 7, 2008 at 9:35 م

    عاشقه الحب
    ———–
    اهلا بيكى شرفتى ونورتى المدونة

    وكويس انك مطلعتيش لوحد اللى بتسالى السؤال ده

    وان شاء الله تزورينا تانى
    تحياتى لكى

  56. اهو ده عيبه said,

    يوليو 7, 2008 at 9:37 م

    اسراء
    ——-
    فعلا عندك حق وان شاء الله احاول انفذ النصيحه

    شرفتى ونورتى

  57. sasatifa said,

    يوليو 7, 2008 at 9:38 م

    دى مشكله عويصه اوى لكن انا بقى عندى حل اسهل من كل الكلام المجعلص والتوه دى
    الحل بسيط وسهل ومش محتاج اكتر من دقيقه واحده
    استقيلى واقعدى فى البيت
    وكده مش هتحتاجى تدوخى وتدوشى نفسك

  58. اهو ده عيبه said,

    يوليو 7, 2008 at 9:43 م

    الزاج روضه الحب
    —————
    ازيك
    انتى منتقبة مش كده وكنتى فى الحفله بس كنتى واقفة بعيد عن الزحمة
    صح ولا لا

    عموما المكان كان زحمة جدا ومجتش مناسبة انى اتعرف على ناس كتير وكنت احب اتعرف عليكى بجد
    عموما ان شاء الله تكون فيه مرات تانية نتقابل فيها على خير ان شاء الله

    سلامى لكى

  59. اهو ده عيبه said,

    يوليو 7, 2008 at 9:46 م

    street
    ———
    اهى وسهلا بيك فى المدونة وان شاء الله متكونش اخر زيارة

    سعيده جدا لرايك وبجد حاجه بسطتنى ان احس ان الكلام عفوى ومقبول ودى حاجه احمد ربنا عليها

    شرفت ونورت وان شاء الله تتكرر الزيارة

  60. اهو ده عيبه said,

    يوليو 7, 2008 at 9:51 م

    white heart
    ————
    والله عندك حق
    حتى الاحذية بقت مشكلة مه ظهور الباليرينا دى وكان الناس خلاص كلهم بيرقصوا باليه
    لا وتلاقى الالوان حاجه تجنن اصفر واخضر واحمر ومنقط ومخطط
    بالذمه فيه حد يلبس جزمة صفرا منقطه والله شايفاها بتتباع وكمان الاخضر المخطط والوان ما يعلم بيها الا ربنا

    ارحمنا برحمتك يارب
    شرفتى ونورتى

  61. اهو ده عيبه said,

    يوليو 7, 2008 at 9:54 م

    sasatifa
    ———-
    ياه كان فين الحل ده غايب عنى
    تصدق لو كل واحده محتارة عملته البلد هتفضى والناس هترتاح

    عموما هناخده فى الاعتبار مع صعوبة التنفيذ
    شكرا لمرورك

  62. طارق الغنام said,

    يوليو 8, 2008 at 9:21 ص

    والله فعلا دى مشكله كبيرة
    بس عند البنات اكبر
    يعنى الشباب اهو محلوله شويه
    لكن البنات معرفش بتصحى امتى وتقعد تلبس وفى ساعات اشوف بنات لابسه بنطلونات مش عارف دخلت فيها ازاى قعدت اد ايه تلبسه مش عارف دة غير الاحمر والازرق
    الحمد لله اننا رجال
    تحياتى

  63. اهو ده عيبه said,

    يوليو 8, 2008 at 2:49 م

    طارق الغنام
    ————
    والله يا استاذ طارق اكيد البنطلون ليه كتالوج
    او معاه ماده تساعد على الانزلاق علشان ينفع يتلبس
    اما الازرق والاحمر فاكيد محتاجين يقوموا مع ادان الفجر علشان يلحقوا يحطوه
    شكرا لمرورك وتحياتى لك

  64. المـــفـــــــقــــــــوعـــــة مــرارتـهــا said,

    يوليو 9, 2008 at 2:27 م

    انا بقالي كام يوم بتمني اني كنت ابقي راجل تحسي انهم شيك ومن غير مجهود
    لكن الست مننا بتدوخ السبع دوخات
    ومافيش فايدة في الآخر باشوف الرجالة ببساتطهم اشيك
    مش عارفة ليه ولا بيتهيألي

  65. اهو ده عيبه said,

    يوليو 11, 2008 at 8:30 ص

    المفقوعه مرارتها
    —————-
    اه صحيح والله عند حق يا سحر
    وبعدين كبيرهم قميص وبنطلون
    مش الزحمة اللى نقعد نحضر فيها قبل ما نلبس

    سلامى ليكى

  66. أحسن تـستاهـل said,

    يوليو 14, 2008 at 7:02 م

    بصي انا عيني مقفلة وعايزة اقوم اظبطها بكباية شاي بلبن بس مش قادرة ما اقدولش انك سكرررررررررر

    مها ميهوووو

  67. azizachom said,

    أبريل 16, 2013 at 4:02 م

    Reblogged this on azizachom and commented:
    احس انها تتكلم عني !!!


أضف تعليق

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

You are commenting using your WordPress.com account. تسجيل خروج   / تغيير )

Twitter picture

You are commenting using your Twitter account. تسجيل خروج   / تغيير )

Facebook photo

You are commenting using your Facebook account. تسجيل خروج   / تغيير )

Google+ photo

You are commenting using your Google+ account. تسجيل خروج   / تغيير )

Connecting to %s

تابع

Get every new post delivered to your Inbox.

%d bloggers like this: